【Emily】曾俊華：中大建築碩士畢業生 三成搵到工

【明報專訊】前財政司長曾俊華曾於美國麻省理工學院讀建築，畢業後做過建築師，佢噚日喺社交媒體發文，話上周三（25日）出席中大建築學院第29屆碩士畢業作品展嘅時候，青春回憶即時返晒嚟。不過佢喺系主任口中知道暫時只有約三成畢業生搵到工。

憶轉行經驗 籲未必要做建築師

佢話向學生致辭時都有講，讀建築，畢業後唔一定要去做建築師，因為呢一科除咗學建築設計同施工技術等專門知識，仲要學習好多跨學科知識，好似美術、設計、歷史同都市規劃，係一門結合文理科知識嘅學科，所以佢覺得讀建築嘅人好有條件去唔同範疇發展，佢自己就係一個例子。

不過，曾俊華話相信好多家長都唔係咁諗，佢哋都期望子女畢業後將來成為大建築師，起番幢The Henderson或故宮博物館，但只有少數人可以做到嗰個級別嘅建築師。佢話自己好鍾意建築，但畢業時撞正建築行業艱難時期，有一段時間佢只係負責畫廁所裏面嘅水管，最後忍受唔到枯燥無味嘅工作，辭工走咗去做佢鍾意嘅裝修建築工程，但收入太奀，唔夠養老婆仔女，唯有離開佢熱愛嘅建築，改去執教鞭，其後返港做官。