【明報專訊】噚日金紫荊廣場升旗禮及會展酒會冠蓋雲集，立法會議員謝偉俊同伴侶白韻琹都有出席。阿Paul話十多年來，佢都會盡量同白姐姐一齊出席慶祝特區成立升旗禮，今年都唔例外，唯一分別係今年想畀白姐姐更舒適出行。噚日白姐姐坐喺一張輕便輪椅，精神奕奕，兩人喺廣場及會展內打卡影相。阿Paul仲話噚日準備好雨天裝備，幸好天公作美，典禮時天氣好好，所以未有機會測試雨天裝備。
噚日唔少議員都參加慶回歸酒會，剛得悉獲授金紫荊星章嘅工聯會會長吳秋北就話，七一除咗係香港回歸紀念日，更係中國共產黨嘅生日，今年迎來成立104周年，黨員過億，「祝福百年大黨，世界上最大的政黨！」
