【Emily】網民話啟德燈展陰森

【明報專訊】九龍城區各界慶典委員會前晚起一連7日喺啟德車站廣場舉辦燈飾展，以九龍城寨、全運會、回歸、代表九龍城區嘅「龍頭」等做主題，至於靚唔靚，市民就有唔同評價。唔少網民形容似紙紮祭品，「盂蘭勝會咁款」，質疑係咪預算唔夠。Emily噚晚去睇過，都見唔少人打卡，好幾個市民都話覺得個展覽有啲陰森，尤其九龍寨城牌坊燈飾望落似靈堂，「好失望，明明回歸係開心日子……𠵱家以為要破地獄」。

九龍中立法會議員楊永杰日前回覆傳媒話，展品係由一名內地藝術家耗時一個月、花咗約38萬元製作，強調政府無資助，費用係由九龍城區地區委會同九龍城各界慶典委員會喺社區募捐得來，「一蚊公帑都無用過」。

Emily噚晚喺現場發現燈展到夜晚9點半左右就熄燈，大家如果想去睇，記得留意時間。