【Emily】新民黨倡港灣區申辦2036奧運

【明報專訊】《施政報告》9月發表，新民黨噚日發表建議書，倡本港與大灣區一齊申辦2036年奧運會。新民黨主席葉劉淑儀話大灣區基建同交通完善，有大型體育設施，絕對有條件舉辦奧運。

建議發展「太空經濟」

新民黨噚日與特首李家超會面提出28項《施政報告》建議，包括以大灣區名義「申奧」。政府財赤持續，對於舉辦奧運嘅財政負擔，葉太以去年巴黎奧運為例，話當地成功吸引大量旅客，有龐大廣告收益，最終錄得盈餘。

另外該黨建議發展「太空經濟」，包括成立「航天辦公室」、設立「航天統籌專員」一職，與商界合作發展太空產業，葉太話香港有條件協助航天企業融資、貿易，與國際制訂和平使用外太空嘅法規等。佢又話香港科學家眾多，建議請中央向聯合國建議，由本港與廣州以「雙中心」形式設立「聯合國空天智能國際創新中心」，研究提升定位、導航、授時服務嘅精確度。

該黨其他建議還包括，容許公務員提取政府作為僱主嘅自願供款置業；設「地產通」，以封閉渠道便利內地居民來港買樓，同時放寬港人北上置業；為生育兩孩或以上嘅母親全額寬免一定年期薪俸稅。