【Emily】旁聽「同性伴侶關係登記機制」討論 岑子杰出獄後首入立會

【明報專訊】前區議員岑子杰因民主派初選案罪成判囚，5月底刑滿出獄後，噚日係時隔多年再度踏足立法會，旁聽政制事務委員會會議討論政府建議增設嘅「同性伴侶關係登記機制」。佢喺會後話，好希望政府就同志伴侶「替代框架」展開公眾諮詢，蒐集唔同團體或人嘅意見，「哪怕係最保守嘅聲音，都應該畀佢哋有表達、直接見官員去講嘅空間」。

曾國衞籲發表言論者深思熟慮 岑：信善意忠告

終審法院前年就「岑子杰案」頒令政府須為同性伴侶確立「替代框架」，政制及內地事務局周三交代方案，局長曾國衞噚日喺會上點名回應岑，話要求外地註冊能省卻核查程序，減少對登記同性伴侶嘅不便，而全球有逾30個國家、地區設相關安排，「應該唔會構成太大困難」。曾國衞又奉勸「公開發表言論嘅人士」以負責任同深思熟慮嘅態度發言，「否則一啲不切實際甚至會為同行人士帶來不良或不利影響嘅言論，不但於事無補，甚至可能有害而無益」。

岑子杰會後回應話，已盡量小心自己言語，「自問我說話嘅內容，比何君堯議員應該溫和好多」，希望局長能感受到佢嘅善意，佢亦相信曾局長提出嘅都係善意嘅忠告。