【Emily】與區會議員鬥波 立會隊靠外援贏3：1

【明報專訊】噚日下晝天氣酷熱，勞工處發出暑熱警告，立法會議員同區議員足球賽就喺艷陽下開波，立法會議員隊喺「外援」幫助下贏3：1。有份落場嘅林振昇話，雖然好熱，但唔算太焗，球場有半邊有陰涼位避陽光，大家都志在出身汗打場友誼波，有外援幫助所以贏到比賽。

區議員隊有港超主席

噚日有落場嘅包括陸頌雄、黃錦輝、梁文廣、姚柏良、郭偉強、何俊賢及李世榮等。據Emily了解，立法會隊入波嘅都係外援，包括屬好波之人嘅前議員梁志祥，以及年輕力壯嘅陸頌雄囝囝，咁嚴格嚟講外援都算同立法會有關連嘅。

球賽喺屯門兆麟運動場舉行，由民青局長麥美娟主禮，佢同副局長梁宏正仲幫區議員隊打氣。區議員首次組隊成軍，成員包括兩名港超球會主席，即北區區議員朱浩賢及大埔區議員林奕權。