【Emily】一哥：無人機巡邏1個月破4案

【明報專訊】4月上任嘅周一鳴噚日首次以警務處長身分去區議會匯報罪案數字，仲連走兩場。佢喺油尖旺區議會話，警方5月推出「小型無人機行動調配」先導計劃，包括喺當區高空巡邏，暫時偵破咗4單案，會研究將計劃擴展至山頂、長洲等地方。

周一鳴話先導計劃成效令人滿意，其中喺油麻地拉咗兩人涉及「太空油」毒品，另喺尖沙嘴偵破扒竊案。佢話呢刻講繼續或擴大計劃係言之尚早，不過會朝住呢個方向，同時會檢視有無需要改善，例如增加告示等。

喺北區區議會，佢提到今年首5個月錄35,888宗罪案，按年跌2.8%，但詐騙案錄17,077宗，按年升8.4%，損失金額28.7億元，按年跌25%。佢話新冠疫情後騙案增長非香港獨有，亦唔係單一城市可處理，慶幸損失金額減少咗，未來會加強令防騙資訊「入屋」，同時加強打擊傀儡戶口。