【Emily】主持電台講斷捨離 黃鳳嫺執書

【明報專訊】卸任消委會總幹事兩個幾月，黃鳳嫺（Gilly）最新動向係擔任商台節目嘉賓主持，同聽眾分享生活經驗。第一集就講「斷捨離」，亦係佢離任後第一大挑戰，要清理辦公室同屋企嘅嘢，最先捨離嘅係佢童年時代睇嘅英文偵探書。

節目下星期一首播，不過商台先透露，Gilly喺斷捨離之前，特意睇咗5分鐘「雞精短片」學習點樣有效斷捨離，諗定策略，另一個重點係要令自己有滿足感，所以佢揀咗先挑戰書櫃，「一眼睇晒，邊啲書可以犧牲，想留嘅書又再放番上去，然後好整齊咁就好有滿足感！」

Gilly已率先整理書櫃，先「犧牲」童年睇嘅英文偵探小說，但保留全套金庸系列，因為佢好鍾意其中兩個角色，至於係邊兩個就要節目播出先知。Gilly原來仲係唐老鴨同黛絲嘅超級fans，佢話相關毛公仔同收藏裝滿10個紙皮箱，日本動畫《龍貓》嘅女主角大卷次子都係佢至愛，相信要捨離都唔容易。

婉拒約會 「要瞓3日3夜」

首次做電台節目主持嘅Gilly又話，做清談節目比做嚴肅訪問輕鬆得多，佢仲透過節目「公告」婉拒朋友嘅約會，因為要實踐離任後一大願望：8月1號至3號要瞓足3日3夜。