稱受情困屈到病 吳忻熹嘗試跟癌細胞「和解」

【明報專訊】吳忻熹（前名吳文忻）去年癌症復發，一直積極接受治療，將推出自傳《因愛重生》，早前透露與丈夫陳劍陵決定分開，結束14年婚姻。近日她接受鍾慧冰主持的網上節目《冰姐的花樣人生》訪問，大談抗癌之路。被問到患乳癌與子宮頸癌是否與情緒有關？吳忻熹直認：「係呀，好多人都話乳癌、子宮頸癌都離不開一個愛字或者一個情字。」

「化癌為機」 出書圓歌星夢

問到怎樣令自己轉好？吳忻熹稱最好早點察覺並面對，「放下佢，好多時女人去到有『拖延症』，唔去到崩潰一刻或真係病，去到某個位先肯逼到做這件事，可能慣了模式，做媽媽、做老婆係咁啦，好多情緒抑壓，自然會生病」。

生病期間，吳忻熹寫抗癌日記、鼓勵同道人和唱歌，感到好享受，重拾喜歡唱歌初心，好想「化癌為機」，「你可能對自己身體及心靈不好，身體對你控訴而有病，這個病畀我好好機會反思，去想有哪些出錯，最重要是『內在小孩』，好多人工作忙碌同掛住照顧家庭，遺忘自己，深深了解後做出改變，我講出來，好多人話畀我聽，有好大正能量與啟發，覺得如果能延續都幾好，於是有出書和出歌念頭，圓自己歌星夢，將能量化為文字及音樂，可傳承開去又有意義」。

付諸實行會否好辛苦，是否先要跟自己和解？吳忻熹說：「係呀，和解這個字好緊要，可以同癌細胞『和解』，不敢話教人，一直話打癌細胞、打仗，直至有個導師同我講，試下跟癌細胞『和解』，傾吓偈，有研究講過細胞是有意識，每日去讚佢，即係同自己傾，和解、和諧，如果鬥的話就兩敗俱傷。」

娛樂組