【Emily】金鐘站街道圖指錯方向 位處E出口附近 港鐵：已安排修正

【明報專訊】港鐵站大堂通常都會有街道圖，方便大家認清方向，搵車站出入口附近有咩大廈、設施、旅遊熱點等。Emily噚日收到讀者報料，話發現金鐘站內有街道圖嘅「指南針」圖案疑似指錯方向，根據街道圖入面建築物嘅方位，指南針箭嘴應該指向右先係北方（N），但圖中嘅指南針就指向下。Emily噚日向港鐵查詢，港鐵話已知悉情况，已安排修正。睇嚟嗰度唔係有咩特別磁場，只係港鐵出錯，大家唔使擔心。

搵路對電子地圖揭發 乘客話離譜

讀者同Emily講，方向標示有誤嘅街道圖位於金鐘站大堂E出口附近、東鐵線乘客常用嘅出閘位，佢噚日想去位於統一中心嘅運輸署辦事處，想搵下應該行邊個出口，但又唔熟路，於是睇下街道圖希望摸清方向，點知睇極都睇唔明，後來用手機嘅電子地圖對一對，先發現街道圖嘅指南針指錯方向。呢位被「老點」嘅讀者向Emily慨嘆，金鐘都算係重要、人多嘅大站，呢種錯誤好離譜。

Emily噚日傍晚去金鐘站睇過，仍然見到上述出錯嘅街道圖。至於出錯嘅街道圖用咗幾耐，港鐵回覆時就無提及，只係話已安排修正。