【Emily】世界技能大賽港隊選拔 孖女活用AI啟發設計靈感

【明報專訊】有「技能界奧林匹克」之稱嘅「世界技能大賽」明年9月喺上海舉行。職業訓練局（VTC）早前舉辦香港代表選拔賽，37個項目有700幾個選手參賽，創歷年新高，其中有超過120個參賽者表現優異，可繼續爭奪香港代表資格。

芸芸優勝者中有一對「孖女」，佢哋自小受媽媽薰陶，如今齊齊登上「平面設計科技」頒獎台。大孖黃詩薏平日鍾意畫圖學習生物科人體結構，細孖黃茜蔓就係動漫迷，鍾意神秘畫風，亦愛自創角色。比賽要求參賽者用電腦軟件設計海報、包裝等推廣產品，呢對「姊妹花」於是喺參賽期間善用AI，生成圖畫啟發創作靈感。佢哋話AI只係輔助工具，唔可以代替原創，畢業後都想成為平面設計師。

另一優勝者鍾啟明就喺「餐飲服務」項目中突圍。佢從小熱愛運動，本身修讀體育相關課程，直到某次喺展覽中認識調酒同款待，決定報讀酒店及旅遊學院餐飲營運課程。佢話成長過程一度迷惘、讀書唔叻，係餐飲服務教佢同人交流，從中獲得啟發。佢回憶備戰嗰陣花一個月練習冲愛爾蘭咖啡，嚟緊會繼續裝備自己，希望可以代表香港出賽。