【Emily】1歲生日 龍鳳胎熊貓郵票8‧15發售

【明報專訊】喺海洋公園出世嘅大熊貓龍鳳胎「加加」（家姐）同「得得」（細佬），呢個月15號就1歲生日喇。香港郵政宣布，以「大熊貓龍鳳胎寶寶」為題嘅特別郵票同郵品會喺當日起發售，包括一套6枚嘅郵票、兩款郵票小型張及相關郵品，展示大熊貓寶寶喺唔同階段嘅生活點滴，見證佢哋嘅成長旅程。

盈盈於舊年8月15日誕下大熊貓龍鳳胎，係香港首次成功繁殖並在港出生嘅大熊貓，香港郵政話，佢哋嘅誕生別具意義，對於香港大熊貓嘅保育同繁殖計劃有積極影響。

全線郵政局同香港郵政網上購物坊「郵購網」今日（8月1日）起發售正式首日封。全套特別郵票同郵品就會喺寶寶生日當日起喺各郵政局同「郵購網」發售，郵政局當日會為所有正式首日封、紀念封、註明首日字樣同本地地址嘅自製封，提供即時人手蓋印服務；當日起並特別推出「大熊貓龍鳳胎寶寶」紀念印，畀市民蓋印留念，直至另行通知。