【明報專訊】工業傷亡權益會歷年幫助唔少工業意外死傷者同家屬，陪伴佢哋渡過人生難關，亦為工友奔走爭取工傷權益。工權會最近推出名為《天下無「傷」》podcast系列，希望透過輕鬆嘅訪談，分享幹事日常工作故事。
第一集就率先由人稱「愛姐」嘅工權會資深幹事梁金愛姑娘分享。愛姐喺工權會工作多年，因為工作關係，經常要出入醫院、殮房、殯儀館等地方，佢仲喺節目透露曾經遇過靈異事件添！
有興趣嘅市民可以喺YouTube同Spotify平台免費收聽節目，工權會每兩星期會播出一集。近年工權會有唔少搞作，早排仲出版新書同舉辦展覽等，以唔同形式記錄工傷背後嘅故事，更重要希望做好工業安全嘅公眾教育。
