【Emily】監警會前委員 大狀李曉華做輔警

【明報專訊】呢期接連有法律界人士加入做輔警，警方噚日喺社交網站介紹，本身係大律師嘅Sylvia（圖）於5月以訓練成績第一名喺學堂畢業，現駐守灣仔分區巡邏小隊第二隊。Emily發現呢名輔警新紮師姐係大律師李曉華，佢曾為2017年到2022年嘅監警會委員。

警方喺介紹中提到Sylvia英國劍橋大學畢業，喺法律界、公營機構及政府部門擔任多項公職，形容佢係「社會上的精英分子選擇加入警隊」，係「少數在擔任多項公職後再投考輔警的社區賢達」，無提及監警會職務。

Sylvia喺社交網站LinkedIn提到自己暫時參與過巡邏、交通執法、書展同動漫展工作，原本以為執勤時會遇到啲激烈案件，但至今都係處理例如無刑事成分嘅市民糾紛、有人暈倒，或以橙帶控制人群。佢話見到受助市民安心嘅神情，「即使工作簡單，依然非常有意義」。

據警方所講，Sylvia今年七一授勳獲頒行政長官社區服務獎狀，可佩戴最高級別警笛繩「紅雞繩」，加上佢係輔警訓練第一名「銀笛獎」得主，話能夠喺制服上同時繫上呢兩樣象徵榮譽嘅物件「極為罕見」。