【Emily】林定國模擬法庭扮「校草」證人

【明報專訊】律政司舉辦嘅「法治教育領袖培訓計劃」進階課程上星期同善導會合作，喺二級歷史建築、前北九龍裁判法院舉行模擬法庭活動，繼上年飾演17歲被告之後，律政司長林定國今年飾演19歲嘅大學「校草」，以網絡暴力受害者證人身分作供，接受學員交叉盤問。

律政司法治建設辦公室話，今次模擬法庭邀請到資深大律師同高級檢控官，為80個學員詳細講解刑事審訊原則，控辯雙方嘅角色，主問、盤問及覆問環節嘅要點；仲專登加入常見嘅錯誤，如頻繁打斷證人作供、主問嘅時候問引導問題等，形容在場學員好專業，「無被司長嚇親」。

對於自己再一次「參演」，林定國噚日喺facebook話，無論係扮演證人或被告，都享受置身法庭嘅感覺，強調喺法治社會，每個人都應有表達同被聆聽嘅權利。