【Emily】哇哇哇開到嚟~~ Chiikawa拉麵店今起「超前」訂位

【明報專訊】今個Chiikawa熱潮席捲暑假香港，唔止有「CHIIKAWA DAYS」大型特展，8月中朗豪坊會有「吉伊卡哇拉麵」，仲係首間海外分店，粉絲可以唔使去到日本咁辛苦。首輪預約今日下晝1點開始，可以預約8月16號至9月15號嘅名額。

「吉伊卡哇拉麵」係以《Chiikawa》漫畫入面「郎」系列拉麵為靈感，店舖佈置仲會還原漫畫場景，多個角色裝扮成拉麵師傅，主角吉伊（Chiikawa）、小八同埋兔哥（Usagi）嘅立體雕塑坐鎮，到時粉絲可以帶埋公仔打卡喇。

預購訂金：一樽黑烏龍茶

香港店同日本店一樣都係賣豚肉拉麵，分量會以吉伊、小八同兔哥分成3種，仲會附送對應角色嘅貼紙，一碗售價介乎115至150元；另外仲有唔同飲品，其中黑烏龍茶樽身都有3個主角，汽水嘅樽身就分別有海獺師傅、栗子大叔同飛鼠。

去過日本店嘅粉絲都知，要預約先可以入去食麵，香港店都一樣用預約制，每個顧客仲要預購一樽黑烏龍茶做訂金，入座當日派發，而且訂金唔可以兌換或扣減餐費。