【Emily】「楊柳」周三闖港800公里範圍

【明報專訊】香港本周可能又會打風。天文台話，喺西太平洋嘅熱帶氣旋「楊柳」，會喺嚟緊兩三日逐漸增強並向偏西方向移動，橫過西北太平洋，料楊柳喺周三（13日）會以颱風級別進入本港800公里範圍，並橫過台灣，之後喺廣東東部沿岸一帶登陸，同佢相關嘅不穩定天氣就會喺禮拜中後期影響中國東南部。

天文台話，強烈熱帶風暴楊柳噚晚8點喺沖繩東南偏東約1000公里，預料向西移動，時速約22公里，橫過西北太平洋。天文台預料楊柳喺未來兩三日逐漸增強，大致移向台灣，隨後路徑及強度仍有變數，較大機會移向福建至廣東東部沿岸一帶。

天文台預測楊柳後日會進入香港800公里範圍，至禮拜四喺本港約400公里外掠過，當日天氣轉差，有驟雨同狂風雷暴；高空反氣旋會喺未來一兩日為華南帶來酷熱天氣，後日日間氣溫上升至34℃。中央氣象台就預測，楊柳會以每小時20至25公里向偏西方向移動，並繼續增強，靠近台灣以東海面，中心附近最大風力達到11級、即每小時108公里。