【Emily】歐盟主任踩單車入大潭 賞雨後風光 讚港郊區近在咫尺 求薦秘境

【明報專訊】香港城市同郊野幾乎只係一步之遙，歐盟駐港澳辦事處主任盧效偉（Harvey）都好鍾意呢個特色。一向踩開單車嘅佢，前日趁放假同天氣放晴，同朋友踩單車去石澳，仲繞道去埋大潭水塘欣賞連日落雨之後嘅景色，又同佢隻狗仔Max去海邊玩水同執網球。

Harvey噚日喺社交網站話，先前去完西班牙放假踩單車同行山，返到香港啱啱呢個禮拜日同朋友去咗石澳。佢話好鍾意香港嘅其中一點，就係只需幾分鐘，就可以好輕鬆咁由繁華嘅城市過渡到寧靜嘅自然風光。佢話雖然行山有少少難，都期待探索更多香港獨特自然風光，亦希望大家可以推介鍾意或隱藏路線畀佢。各位又有無心水呢？

愛爾蘭領事遊三棟屋

愛爾蘭駐港總領事白嬿（Jennifer）都有發掘香港好去處，近期去咗荃灣三棟屋博物館，認識客家文化。Jennfier話，博物館係香港鬧市入面一個充滿歷史同文化氣息嘅小寶藏，由精緻嘅燈籠工藝，到活靈活現嘅獅頭同宏偉嘅竹棚，都講述緊一個關於傳統同藝術嘅故事。佢好期待將來有合作機會，等愛爾蘭同香港藝術家交流，欣賞吓雙方傳統文化同歷史。