【Emily】DSE視藝科低分作品 藝術家讚超靚

【明報專訊】考評局每年都公開唔同科目考生嘅答法畀外界參考，有創作人就留意到中學文憑試（DSE）視覺藝術科（VA）近年被評最低第一級嘅考生作品，發現都有唔少驚喜，話可搞番個「DSE VA level 1展覽」，引起網上熱議。有「花生友」話畢加索去考可能都只係拎第一級，亦有人認為藝術好主觀，只係考試制度限制咗考生嘅發揮咁話。

網友話畢加索都考唔到高分

較多人「睇中」並「平反」當中3幅畫作，其中2023年一幅描寫男生喺街燈下球場獨自踢波（圖1），答卷中解釋唔同光源意念。新晉藝術家黃進曦都有留言形容幅作品「超靚」，「想睇吓佢其他作品」。有網民亦留言話，幅作品同英國著名藝術家David Hockney畫風有啲似。

另一幅舊年作品，就畫咗幾個男仔一躍入水（圖2），不過呢幅就被認為同日本繪畫師喺2020年嘅作品雷同。仲有一名考生提交嘅創作簡報，中間一片空白，周圍有疑似上面作畫留底嘅顏料痕迹，都被大讚「藝術成分好高」。