【Emily】將軍澳年內雨量2397毫米 全國第一

【明報專訊】本港近月連場暴雨，天文台今年至今已發出5次黑色暴雨警告信號，係有紀錄以嚟最多黑雨嘅一年。內地中央氣象台噚日喺社交平台微博發文話，香港將軍澳地區氣象站由今年1月1日至8月16日嘅累積降雨量達2397毫米，係全國最高，比起第二位嘅廣東省佛岡累計降雨量2172.3毫米，多出224.7毫米；第三位係廣東省英德基本氣象站，累計降雨量2051.3毫米。

雨量頭十有九來自廣東省

至於累計降雨量前10名嘅其他地區，大部分都係喺廣東省，當中只有位列第7嘅黃山係喺安徽省，其累計降雨量係1940.8毫米。

本港近期多次發出暴雨警告信號，將軍澳係水浸重災區之一，其中天文台今個月5號喺清晨發出黑雨信號期間，將軍澳敬賢里停車場嚴重水浸，多輛汽車被雨水淹沒，渠務署要出動強力排水機械人「龍吸水」吸去積水。

天文台資料顯示，將軍澳單係上月嘅總雨量有670毫米，較舊年嘅435毫米大增54%，亦係近年最多雨量嘅7月。