【Emily】輕鐵下月落實「貓狗同行」 長者報九巴「寵物巴士團」半價

【明報專訊】港鐵今年5月喺輕鐵推「貓狗同行」試行計劃，由於試行期間輕鐵營運維持暢順，乘客普遍支持，港鐵噚日宣布9月起正式落實計劃。另外，一眾合資格「銀髮族」帶寵物參加九巴「寵物巴士團」可享半價優惠，例如一人一寵普通票價60元，長者只需30元。

港鐵話試行計劃推出以嚟，超過1300名乘客購買「貓狗同行證」，港鐵亦訪問攜帶寵物及非寵物主人嘅乘客，意見調查反映九成五以上受訪者普遍給予試行計劃正面評價。落實計劃後，相關守則同試行計劃一樣，乘客仍只限周末及公眾假期帶寵物搭輕鐵、用輕鐵最後一道門上落並全程留喺車尾位置、將貓狗完全放入寵物袋等。有興趣嘅乘客可喺每月23號起登入港鐵應用程式買下一個月嘅電子「貓狗同行證」，每張證99元。

至於九巴，65歲或以上長者喺九巴應用程式報名參加本周五（22日）或以後嘅「寵物巴士團」可享半價優惠，一人一寵長者票價30元，二人一寵45元；月票一人一寵長者票價50元，二人一寵75元。