經濟
迷你LABUBU據報經AliExpress全球開賣
【明報專訊】潮玩品牌泡泡瑪特（9992）旗下「吸金王」LABUBU再推新款，集團創辦人、董事會主席及行政總裁王寧星期三（20日）預告，今個星期會發布Mini版LABUBU。據內媒報道，今次新品唔單止會喺國內發售，更會透過阿里巴巴（9988）旗下跨境電商平台速賣通（AliExpress）上嘅泡泡瑪特官方旗艦店同步「出海」，開放畀全球潮玩愛好者購買。
小琴翻查資料發現，泡泡瑪特早喺2019年就已經官方進駐速賣通，拓海外市場。隨住LABUBU成為全球現象級IP，泡泡瑪特嘅速賣通官方旗艦店銷量亦都高歌猛進。今年「海外618」前夕，「LABUBU」一度成為平台關鍵字搜索榜嘅榜首；泡泡瑪特官方店亦穩居潮玩類目首位，帶動平台潮玩類目上半年整體商品交易總額（GMV）按年激增300%。「海外618」期間，速賣通更邀請海外平台網紅喺北京泡泡瑪特城市樂園直播帶貨，LABUBU當時更吸引咗20幾萬人跨時區「蹲守」搶購，證明咗佢喺全球範圍內嘅超高人氣。
email:[email protected]
