【Emily】話靠朋友先拎到飛 盧煜明第一次睇林家謙live

【明報專訊】歌手林家謙相隔3年再次擇日喺暑假尾聲開紅館騷，Emily亦把握時間唞暑睇騷，其間遇上坐第二排嘅中大校長盧煜明。盧教授分享話自己好鍾意家謙啲歌，佢冇份睇家謙早幾年首個個唱，今次終於有份入場，第一次聽家謙唱live，佢指住朋友話「靠佢」先拎到飛。

林家謙一連10場個唱，前日（23日）第四晚搵咗鄧麗欣做嘉賓，唔少觀眾企晒起身，氣氛高漲，睇緊騷嘅Emily中途見到後方有個熟悉身影，發現盧教授亦係座上客，佢一身便服企喺度隨歌聲打拍子、揮動熒光棒。

下星期踏入新學年，Emily睇完騷後問盧教授準備好返學心情未，佢就淡淡然話暑假照開工，「冇乜休息」，並已做好「暑期作業」，佢賣關子話準備好9月1號開學禮嘅講稿，迎接中大同學。