【Emily】許仕仁岑國社案判辭 英澳加都引用

【明報專訊】上訴庭副庭長麥機智噚日喺大律師公會論壇話，香港嘅反貪法律一直領先全球，尤其公職人員行為失當控罪，英國、加拿大、澳洲普通法地區都一直引用許仕仁案同岑國社案等香港判辭。

引許案澳案件 潛在法官爸爸有份審許

麥機智舉例，澳洲新南威爾士州法院2023年駁回一宗公職人員行為失當嘅上訴，都採用香港終院判辭邏輯。佢話，雖然案件會終極上訴，但辯方無爭議許仕仁案中結論，另一個有趣嘅係澳洲高院（當地最高法院）法官Jacqueline Gleeson預計有份審，佢爸爸就係當年有份審許仕仁嘅時任終院非常任法官紀立信。

43年前嚟香港做政府律師嘅麥機智憶述，嚟到當日正正就係英國時任首相戴卓爾夫人喺北京人民大會堂落樓梯失足。佢認為，以前法官質素參差，法庭判決無內部傳閱，至今香港司法制度已有長足發展。

同場嘅廉署執行處首長丘樹春話，佢當年係負責岑國社案嘅調查人員（case officer），告岑公職人員行為失當，當時係第一單以普通法入罪。廉署諗過將呢條罪寫成成文法，佢話正因為單案定罪同上訴都判控方贏，所以內部放棄呢個念頭。