Emily Online︳亞洲網紅創意大賽啟動　助逾百位參加者投身電商 (19:02)

大灣區青年電商慈善基金舉辦「第一屆亞洲網紅創意大賽」，今（26日）舉行啟動禮。大賽籌委會主席王琪話，比賽係為咗發掘同培育出亞洲區嘅頂尖內容創作者，會透過同教育機構合作，以正規嘅培訓，裝備幾百位參加者同中小企知道做網紅嘅知識同技巧，甚至教佢哋用人工智能，幫助佢哋建立個人或者企業嘅業務同令更多人投身電商行列。

「第一屆亞洲網紅創意大賽」分初賽、復活賽同決賽，參加者喺比賽期間，要透過短片、直播等同人競爭，贏咗比賽嘅人除咗有機會成為新一代網紅，仲會獲得超過百萬嘅獎金同獎品。大賽聯合發起人及策劃總監及統籌王世傑話，預計今次活動嘅媒體曝光量超過一億，形容係網媒界的 「造星」。

網紅「霍哥」係今次大賽嘅活動大使，佢話無人天生就係網紅，鼓勵有意成為內容創作者嘅人勇敢踏出第一步，仲要多啲留意身邊嘅事物，去啟發自己嘅創作靈感，先可以令觀眾對內容更加有共鳴。