【Emily】嚴打違例吸煙 兩日發18票控 8‧31起增10運輸設施禁煙區

【明報專訊】衛生署控煙酒辦星期一（25號）起，一連6日喺全港公共運輸設施法定禁煙區加強打擊違例吸煙。控煙酒辦主任林民聰噚日喺港台節目話，控煙酒督察喺過去兩日已巡查超過100次，主要集中喺人流較多嘅公共運輸設施，共發出18張定額罰款通知書。

前年起便服執法 票控翻倍

林民聰話，署方事前高調宣傳今次執法行動，相信市民會特別警惕，但署方無定票控數量目標。佢又話控煙酒督察前年起以便服巡查同執法，即使巡查次數無大幅變化，發出嘅定額罰款通知書由2022年約6000張倍增至舊年約1.3萬張，反映策略成效。

至於星期日（31號）起將會多10個公共運輸設施列為禁煙區，林民聰解釋，新增地點純粹因應交通路線改變同有新設施落成，亦會加強宣傳，包括喺網頁列出全部禁煙範圍、喺禁煙區內放標示。署方會不時檢視最新情况，將新符合定義嘅場所納入禁煙區，而唔係考慮地點人流或係咪偏僻。

另外，海關噚日聯同荃灣區議員、衛生署控煙酒辦、房署及關愛隊，到荃灣梨木樹邨向屋邨保安、居民同商戶宣傳反私煙修例建議，鼓勵舉報懷疑私煙活動。