【Emily】下月一帶一路高峰論壇 18地90翹楚參加

【明報專訊】第10屆「一帶一路高峰論壇」將於9月10至11號喺會展舉行，今屆以「合作求變 共建未來」為主題，大會話有超過90名來自18個國家同地區嘅政商翹楚參加，由金融、投資、基建、航運物流以至創科同綠色發展乜都傾，等各地尋找龐大商機，促進國際之間嘅合作。

過去9屆，論壇共搞咗超過5400場對接會，幫手促成咗30幾單合作，包括基建、金融、科技等範疇。商經局長丘應樺話，香港同「一帶一路」國家嘅貿易額，自2013年起已經升咗八成，達到約2800億美元，證明香港作為國際貿易同投資樞紐嘅強大實力。

除此之外，今年論壇有好多新搞作。商經局「一帶一路」專員何力治話，將加設焦點市場、可持續發展圓桌、青年商業領袖交流等環節，並且會舉辦超過20個唔同類型嘅活動，包括藝術展覽、音樂會、中學問答比賽等等。佢希望透過上述活動讓市民參與同體驗「一帶一路」帶嚟嘅豐富成果。

論壇會由特首李家超致開幕辭，政策對話請到來自馬來西亞、土耳其、斯里蘭卡等國嘅部長級官員。