【Emily】中六畢業生做醫局義工 見識醫院運作準備入行

【明報專訊】暑假結束，醫管局新界西醫院聯網噚日回顧喺6至8月舉辦嘅青年義工計劃。參加者接受培訓後可以支援醫院運作，例如探訪同慰問病人，計劃今年有約300個15至25歲青少年參加，人數創新高，有參加者話難忘同病人相處嘅點滴。

啱啱中六畢業、讀化學同生物科嘅李紫棋（左，政府新聞處），有志投身醫療行業，於是今年參加咗青年義工計劃，提前了解醫院運作。佢覺得喺病房同病人傾偈好有意義，尤其部分病人冇咩親友探訪，義工就可以帶嚟安慰。

探病人陪治療 服務總監讚幫到手

暑假期間，屯門醫院、博愛醫院、青山醫院等為義工舉辦一系列活動，包括參觀醫院廚房、殮房、急症室、藥劑部等，義工都會探訪病人、陪佢哋治療，又會幫手宣傳醫管局手機程式HA Go。今年仲有屯門醫院神經醫學中心顧問醫生向義工介紹「磁波刀」技術，而之前去咗緬甸救災嘅新界西聯網急症部顧問護師都同義工分享經歷。

計劃負責人、醫管局新界西醫院聯網服務總監（基層及社區醫療）吳楊城就讚義工幫到手，例如門診流程本身繁複、醫護又忙，由義工帶病人到唔同地點，令過程更順暢。