【Emily】港燈伙環團 帶隊夜探郊園搵動物

【明報專訊】港燈同長春社合作嘅「綠遊香港」計劃，早前安排近20個來自新家園協會嘅新來港人士，喺夜間導賞員陪同下去大潭郊野公園夜行，探索夜行動物嘅蹤迹，包括香港獨有嘅盧氏小樹蛙，仲有全港唯一有尾巴嘅兩棲類動物「香港瘰螈」等。

參加者喺黑漆漆嘅郊野公園，要拎住電筒沿途尋找夜間出動嘅小動物，今次都幾幸運，帶隊嘅夜間導賞員陳愛琍話，除咗見到少見嘅盧氏小樹蛙同香港瘰螈外，仲見到短腳角蟾同香港湍蛙，同樣係香港嘅原生物種，形容此行好有驚喜。參加者之一、新家園協會會員郭先生係第一次夜遊郊野公園，佢話睇完先知道原來夜間生態咁豐富有趣，參與嘅小朋友都好興奮。

今次係「全國生態日」活動之一，港燈話生態保育唔止提升生活質素，更彰顯人類同自然和諧共生嘅價值。