【Emily】75應屆牙科畢業生加入衛署實習

【明報專訊】首屆「牙科實習計劃」嘅75個應屆牙科畢業生已加入衛生署，開始12個月實習。噚日出席計劃啟動禮嘅醫衛局長盧寵茂話，牙醫必須通過不斷嘅臨牀實踐先會進步，期望實習牙醫未來一年充分磨練手藝，亦透過同病人接觸，建立醫患互信及對病患嘅同理心。

呢批實習牙醫完成兩星期入職培訓後，會被派去衛生署、醫管局及菲臘牙科醫院輪轉工作，喺資深牙醫督導下提供服務，主要工作範疇包括牙科全科、緊急牙科、醫院牙科、學童牙科保健及社區特殊牙科服務。

出席啟動禮嘅衛生署長林文健話，臨牀實習唔止學習技術同知識，更係培養解決問題能力、增強與病人溝通技巧嘅重要階段，寄語實習牙醫要積極面對挑戰，建立團隊合作精神。

實習計劃因應今年4月實施嘅《牙醫註冊條例》推行，條例規定本地牙科畢業生同通過許可試嘅非本地培訓牙醫都要完成12個月實習期，獲頒經驗證明書先可以註冊。