【Emily】考察深圳 灣區專員試無人小巴

【明報專訊】內地近年積極推動無人駕駛，粵港澳大灣區發展專員陳潔玲噚日到訪深圳，就去咗體驗上星期先開通嘅無人駕駛小巴路線B888。呢條路線來往羅湖口岸同商場「萬象食家」，途經多個核心商圈同文化歷史地標站，例如國貿、地王大廈、大劇院等。Emily睇番資料，呢條無人駕駛小巴路線𠵱家免費試搭，座位有限，需要喺「深巴出行」微信小程序預先登記，大家北上都可以試下。

陳潔玲呢次到訪深圳係考察當地智能交通同機器人產業嘅發展。佢噚日試搭完無人駕駛小巴後，亦都去咗龍崗區參觀全球首家機器人6S店，了解多項創新服務，包括機器狗、機器人咖啡師等，佢亦都體驗同人形機器人握手。陳潔玲鼓勵香港企業及科研機構同大灣區內地城市「強強聯手」，一齊促進區內創科事業更蓬勃發展。