【Emily】黃偉綸訪西貢秘密抗日基地

【明報專訊】北京今日舉行抗戰勝利80周年大閱兵，而特區政府近日都響應主旋律，搞咗好多有關抗戰嘅活動，近日各司局長仲輪流去各區同抗日有關嘅地點「打卡」，然後出帖提醒大家認識歷史。噚日大部分司局長上咗北京等睇閱兵，而留守嘅副財政司長黃偉綸就去咗西貢沙角尾村育賢書室，同4個村長交流。黃偉綸話當年西貢係東江縱隊港九獨立大隊大本營，而育賢書室就係秘密抗日基地，有重要歷史價值。

律政司長林定國近日亦去咗上環儒林臺8號舊址打卡，嗰度曾經係東江縱隊港九大隊嘅情報觀察站，𠵱家已經變咗高樓大廈。副律政司長張國鈞就去咗中環皇后大道中太平行，戰時嗰度有間粵華公司，以經營茶葉生意做掩護，廣泛開展反日宣傳聯絡工作。張國鈞話政府喺全港多個中共抗戰遺址加設咗資訊牌介紹歷史，鼓勵大家去睇睇。