【Emily】調查：近半青年避追問「hea答」父母 七成自尊感偏低 有時覺一無是處

【明報專訊】暑假啱啱結束，青年人有無把握機會同父母溝通？菁研工作小組同突破機構調查發現，當被問及讀書或工作情况，46%青少年唔想父母追問而「hea答」。另平均有逾72%受訪者自尊感偏低，傾向同意有時覺得自己一無是處，但未至於全部認為自己係失敗。

調查機構舊年3至12月訪問526名15至29歲嘅青少年，了解佢哋嘅期望同父母嘅無條件認可等，大部分受訪者認同父母會放心畀自己負責自己嘅人生，而即使現實唔同父母期望，父母都會接納而唔會打算改變仔女。

但與此同時，有近四成受訪青年認為，父母會覺得自己過去嗰套更實際，仔女應該聽佢哋講；逾五成就覺得父母認為仔女總係做得唔夠好，要教番啱佢哋。

好多時仔女唔想父母擔心，都唔想「交代」咁多。調查就發現，五成受訪青少年傾向報喜不報憂，有近四成青少年就為免同父母爭論，假裝附和對方。

突破輔導中心經理廖暉清認為，父母若能開放了解自身同子女成長嘅時代處境不同，接納子女嘅選擇，相信有助改善兩代人嘅關係，提升彼此嘅自尊感同安全感。