【Emily】李世榮包場請街坊睇《南京照相館》 AI抗戰老兵訪真光 同學生對話

【明報專訊】今年喺抗戰勝利80周年，政府及政黨繼續搞愛國教育活動響應。講述1937年南京大屠殺嘅電影《南京照相館》噚日正式喺香港上畫，超過20間戲院播放，購票網站WMOOV顯示，噚日多個場次都有大量吉位。呢套戲咁有教育意義，有建制團體支持，之前優先場票房短短6天累收近180萬元，而噚日民建聯立法會議員李世榮亦喺將軍澳嘅戲院包場，安排咗過百個街坊去睇免費戲。

《南京照相館》取材自南京大屠殺期間，一群南京市民匿喺「吉祥照相館」避難嘅故事。Emily睇咗周六嘅預售，購票網站WMOOV及hkmovie6都呈現大片「綠色」，即係有大量座位可預訂，而喺周六嘅hkmovie6頁面，有3個場次係「紅色」，即係唔售票，可能係有人包場。仍未落畫嘅日本動畫《鬼滅之刃無限城篇》周六各場次其實都一樣係大片「綠色」，呢套片上映近3周，香港票房超過7000萬元。

另外，副教育局長施俊輝噚日就帶埋「與抗日戰士AI對話」互動一體機到訪九龍真光中學，學生可以同屏幕入面嘅AI虛擬抗戰老兵對話，學生之後會撰寫「給抗戰志士的一封信」，表達對先烈嘅謝意。