【Emily】山道天橋滑板飛馳 警接報案列投訴

【明報專訊】西區山道天橋喺全港市區最高行車天橋之一，前日網上流傳一段車cam片，顯示兩人喺山道天橋踩住滑板飛馳。片段顯示，兩人各自戴上頭盔及戴手套等防護裝備，張開雙手喺山道天橋高速下滑，過程由後方車輛拍低，只見兩人不時扭動身體控制方向，跟隨天橋轉彎、在兩旁高樓之間俯衝，未見減速。

警方噚日回覆Emily話，前晚接獲報案話有人喺山道行車線玩滑板，案件列作「投訴」，暫無人被捕。Emily喺一個上載咗好多「板仔」飛馳片段嘅Ig帳戶都見到呢條片，網民留言兩極，有人話「危險但羨慕」，亦有人提醒「小心甩尾」。

山道天橋係單線高架行車天橋，入口處有告示講明禁止單車及行人進入。根據 《道路交通（交通管制）規例》，任何人違反「禁止行人、騎單車者進入」交通標誌，一經定罪可罰款2000元。