【Emily】丘應樺訪抗戰遺址 懷緬阿爺丘逢甲遺志

【明報專訊】多名司局長近日先後到訪香港嘅抗戰遺址，其中商經局長丘應樺去到沙頭角抗戰紀念館同烏蛟騰抗日英烈紀念碑，令佢諗起爺爺丘逢甲嘅抗日事迹，仲話爸爸同伯父其後都繼承爺爺嘅遺志，抗戰期間參與抗日，家族嘅承傳對佢影響好深。

丘局長話透過父親得知，爺爺當年對甲午戰爭後被迫割讓台灣非常悲憤，於是號召同胞組織義軍反抗，後來因彈盡援絕無奈退到廣東，爺爺就透過辦學報國。

丘局長噚日去嘅沙頭角抗戰紀念館係香港第一間抗戰紀念館，佢同「抗日一家人」沙頭角南涌羅氏後人包括紀念館長黃俊康一齊參觀。佢話，日前喺北京抗戰勝利80周年閱兵儀式上，獲邀喺天安門城樓觀賞閱兵嘅90多歲抗日老兵，正係羅氏家族成員。

「大營救」渡海點 西貢企嶺下豎牌匾

另外，漁護署喺馬鞍山郊野公園西貢企嶺下西沙路豎立牌匾，紀念抗戰勝利80周年，噚日主禮揭牌儀式嘅環境及生態局長謝展寰提到，企嶺下係抗戰期間「秘密大營救」嘅重要渡海據點，抗日文化人士當時輾轉去到企嶺下海灣，再渡海撤離香港。佢又話，豎立牌匾為紀念抗戰人士無懼犧牲保家衛國外，亦要讓更多市民認識呢段歷史。