【Emily】馬鞍山交通總站翻新 有冷氣有電叉

【明報專訊】運輸署之前喺馬鞍山市中心公共交通總站做咗多項改善工程，其中有配置咗冷氣嘅候車室，畀市民可以喺炎炎夏日涼住冷氣等巴士，乘客都讚好。候車室內唔止有櫈，仲有自動販賣機同手機叉電設施，亦有巴士實時到站時間顯示屏。運輸署首席運輸主任嚴啟龍話，馬鞍山市中心公共交通總站𠵱家做緊第二期改善工程，會再加多兩個巴士乘客候車室，一樣有冷氣同櫈，總站內嘅的士站都會翻新，預計2026年完成。

有別一般公共巴士站嘅並排式設計，馬鞍山總站設計改咗做鋸齒式，行人唔使再橫過巴士行車道去唔同車站等車，善用空間得嚟又可以分隔人車，更加安全。運輸署又話，已經聯同相關部門喺全港18區揀個公共運輸交匯處做提升工程嘅試點，計劃加強燈光照明、改善通風系統同翻新牆身等，而今年首季亦已更換咗荃灣灣景花園巴士總站嘅通風系統。