【Emily】工聯招聘會效內地直播帶崗

【明報專訊】工聯會噚日喺荃灣舉辦新界西招聘會，提供超過600個職位空缺，涵蓋銀行、物管、飲食、零售、建造等行業，工友除咗可以到場面試見工，現場有「直播帶崗」，工友可以睇直播搵工。

工聯會副理事長、立法會議員陳穎欣話，走訪內地時知道部分工會借助直播幫工友搵工，今次招聘會都仿效內地做法，聯同葵青區議員周潔莹、荃灣社區幹事夏泳迦喺場內首次嘗試用「直播帶崗」幫工友搵工。勞福局長孫玉菡出席招聘會致辭時話，見到工聯會用「直播帶崗」形式做招聘反應好，當局會研究做好職位配對嘅新方法。

工聯會會長、立法會議員吳秋北提到，針對近期失業情况，工聯會已經推出失業登記服務，為完成登記嘅市民提供就業輔導同服務，又預告未來會持續舉辦同類招聘會助工友就業。