【Emily】明清書畫聚中大 文徵明墨寶亮相

【明報專訊】中文大學文物館最近展出一批書畫卷軸、古籍善本、器物等，由熱愛藝術嘅黃氏家族捐贈，總共有超過100套展品，主要反映明清時期嘅中國藝術同書畫發展，仲顯示到廣東文人精英嘅收藏品味。中大嘅精選藏品之一係明代畫家文徵明嘅著作《落花詩書畫》，展出至出年3月22日。

中大話，今次展覽旨在紀念黃氏家族後人向中大捐贈嘅書畫珍藏。黃秉章家族成員代表黃匡濟噚日喺開幕禮提到，展覽命名為「嶺海墨林」，寓意珠江三角洲一帶嘅水墨收藏，而展出書畫收藏主要係第一次至第二次世界大戰期間喺廣州收集，之後遷移嚟香港。

捐贈收藏都同黃氏家族與利氏家族係百年世交有關。黃匡濟話，佢同利乾、利憲彬係網球好友，父親黃秉章就同利銘澤、利孝和、利榮森有多年友誼，所以將收藏捐贈畀由利榮森協助成立嘅中大文物館。