【明報專訊】九龍仔游泳池喺1964年啟用，設計古色古香，內有庭園，一直深受九龍城區街坊歡迎。不過由於設施太舊，政府早幾年申請11.2億元撥款重建，按2020年立法會財委會文件，原預計2024年第二季完工，但街坊等了又等，過咗今年夏季都未見影。康文署噚日公布好消息，話泳池已完成第一階段重建工程，室內主池今日（11號）終於可開放，至於第二階段工程，包括戶外訓練池及嬉水池嘅重開日期就要容後公布。
睇番重建後嘅主池，由以前嘅室外池變成室內池，主池50米乘25米，有1200個座位，重建後亦新增暖水池設施，街坊將來冬天都有地方可以暢泳。
