經濟
鄭志剛妻現身線上職業配對平台啟動禮
【明報專訊】新世界發展（0017）前副主席鄭志剛完全退出家族業務後，同太太鄭余雅頴一直鮮有露面，不過由佢喺2022年疫情期間創立嘅「Share for Good 愛互送」就繼續前行。愛互送今年再與宏利合作，推出加強版職場提升計劃「Future PoweredUp」，引入全新線上職業配對平台「FLEX」，計劃噚日進行啟動禮，鄭余雅頴更罕有現身撐場！
作為愛互送董事嘅鄭余雅頴表示，計劃期望幫助更多婦女及提早退休人士，喺裝備自己及解決日常生活嘅壓力後重投職場，樂見計劃可支持香港人才庫所需，為社會注入更多勞動力。
宏利就話，職場提升計劃「Future PoweredUp」首階段對象係500名基層婦女及提早退休人士，FLEX可助簡化登記程序同埋打破傳統「履歷障礙」，令參與者唔使度身訂做履歷表都可以配對兼職、半職或其他具彈性工作安排嘅職位，以減輕對履歷同面試嘅心理障礙。
