【Emily】港大研究：行得快降患癌風險

【明報專訊】港大醫學院藥理及藥劑學系研究發現，行路快嘅人整體患癌風險較低，其中對肺癌影響尤其顯著，肺癌風險下降幅度可以高達53%。研究團隊話，佢哋嘅身體炎症標記物、脂質代謝嘅參數都比較低；行得快亦有助保護呼吸系統，從而減低患癌風險。今次研究已經喺《惡病質、肌少症與肌肉雜誌》發表。

研究分別喺英國同香港進行，研究團隊先分析英國生物庫超過43萬名參與者嘅數據，並喺香港群組做驗證。英國數據主要由參加者自己報告步行速度，香港參加者就要做6米計時步行測試，港大發現，英國快步者整體患癌風險降低13%，香港快步者風險更降低45%。

研究團隊進一步分析發現，大約四分之一嘅保護效果，源自行路快嘅人，其身體炎症標記物同脂質代謝參數比較低。

港大醫學院藥理及藥劑學系副教授張正龍話，雖然今次係一個觀察性嘅研究，但參與人數龐大，追蹤時間好長，英國同香港嘅追蹤時間分別係10.9年同6.9年，相信可以佐證「快步者可能擁有更健康的身體狀况」嘅假設，佢話研究亦為未來探索開展新方向，例如探討點樣透過改善步速，以幫助癌症患者康復或降低患病機率。