【Emily】電子駕照推出 用App展示

【明報專訊】運輸署噚日起推出電子駕駛執照（圖），全港約250萬個揸車人士之後可以喺手機展示，代替實體駕駛執照，以符合要攜帶同出示車牌畀執法人員檢查嘅法定要求。

市民即日起可下載運輸署「電子駕駛執照」App，再用「智方便」或「牌證易」網上電子牌照平台帳戶認證，登入讀取包括正式、學習、暫准、臨時駕照，同埋駕駛教師執照，每個駕駛者只可登記一個戶口，每個戶口只可綁定一部手機。

運輸署會繼續發出實體駕照，兩種駕照嘅資料都會顯示持有人姓名、駕照號碼、准駕車類別同有效期。不過，電子版會用顏色標示駕照狀况，例如藍色代表「有效」、黃色係「部分有效」、紅色就係「已過期」。運輸署提醒，電子駕照只可喺「電子駕駛執照」App用指定格式展示，當中有多層保安措施防止偽冒，例如身分認證、動態運輸署標誌同禁用屏幕截圖功能等。