【Emily】機械人「天工」首駐港「大展鴻圖」 將用於商場推廣 擔任機構大使

【明報專訊】被稱為「人形機械人第一股」嘅港股上市公司優必選，噚日舉行新聞發布會，展示佢哋喺香港應用嘅首部人形機械人「天工」。天工現身嗰時徐徐步向台前，向在場嘅人揮手，其間更配合近期喺抖音大熱嘅歌曲《大展鴻圖》展示舞技。天工未來會喺香港用於商場活動宣傳、擔任機構大使等。

噚日喺記者會展示嘅天工帶語音及視覺功能，支持DeepSeek、ChatGPT等大型語言模型，身高172厘米、重73公斤，可以時速10公里奔跑。同一系列嘅天工Ultra機械人喺早前北京嘅人形機械人半馬拉松率先衝線，奪得冠軍。

高172cm 跑步10km/h

優必選現時透過香港嘅「生態戰略伙伴」，喺唔同範疇應用佢哋嘅技術方案，其中喺香港引入首部天工機械人嘅EDUGROUP Worldwide Limited，行政總裁羅棋同Emily講，佢哋舊年只係優必選喺教育板塊嘅香港總代理，今年會將合作範疇擴展到工商等用途。

羅棋又話，最新引入嘅天工會用喺商場推廣，舉例可以派發帆布袋同優惠券，並擔任唔同機構嘅大使；另外亦可協助大學做調研，以及因應唔同行業場景需要，為佢哋提供人形機械人嘅編程服務。