【Emily】李惟宏議辦「尿袋」冒煙 屬紀念品 中電叫停用

【明報專訊】用「尿袋」叉電要留神，否則隨時招祝融。話說前日晏晝約1點半，金融服務界立法會議員李惟宏（Robert）嘅辦公室，有一個印住中電標誌嘅充電器冒煙。Robert同Emily講，呢個充電器係同事嘅，而立法會秘書處收到通知後即刻派人去睇下，又擺咗部抽風機抽走啲煙，不過可能有啲煙經中央冷氣系統飄咗去其他議辦，所以意外後佢都同其他議員「打番招呼」。

Robert話事發時佢唔在場，不過據了解，當時同事係正確使用充電器，後來都提醒對方盡量用插座叉電。立法會秘書處前日傍晚發電郵，提醒大樓使用者注意由機電署發出嘅「充電器及供電裝置的安全須知」，包括留意充電器有無安全規格證明書，亦唔應該用太耐等。

中電回覆Emily話，得知事件後派員到場了解，並要求供應商跟進；而呢款充電寶係企業紀念品，據了解係第一次冒煙，已通知相關嘅人停用產品。