【Emily】機場百年印記展 一覽啟德跑道燈號

【明報專訊】今年係舊啟德機場成立100周年，機管局即日起至11月8號會喺機場接機大堂舉辦「香港機場百年印記」展覽，介紹機場由啟德到赤鱲角時代嘅歷史同未來發展，其間會展出昔日啟德機場嘅跑道燈號、唔同航空公司初代嘅彩色實體機票等。

展覽分3部分，第一部分講述香港機場喺1925年開幕至1970年嘅早期發展，追溯當年啟德機場點樣由一塊地皮演變成香港首個客運機場、再發展成東南亞主要國際航空樞紐。第二部分就聚焦機場1970年至1998年嘅多個重要里程碑，包括啟德機場喺1986年成為其中一個全球最繁忙機場嘅黃金時代，同埋1998年搬去赤鱲角嘅歷史性行動。最後一部分就介紹機場城市，講下機場由1998年起至今嘅發展。

運輸及物流局長陳美寶噚日喺展覽開幕致辭時話，香港機場𠵱家連接全球超過210個航點，每年招待超過5310萬名旅客同處理490萬公噸貨物，客運貨運都屬於「頂流」。佢又話，擴建後嘅二號客運大樓旅遊車候車大堂下周啟用，而大樓其他設施預計明年第二季初啟用，相信到時旅客喺機場可以享受到嶄新出行體驗。