【Emily】提金融商貿物流 曾俊華：點解唔做好港經濟最大嗰瓣？

【明報專訊】特首李家超上周發表《施政報告》，3.8萬字涉及不同範疇發展方向，包括北都、創科，並提及推動航天科技發展建設、支持太空經濟。前財政司長曾俊華噚日不點名做時評，話「或者前幾日大家聽咗幾個鐘之後，都唔係好知道我哋未來經濟有乜嘢確實嘅新出路」，佢話自己好支持創科，但「去到上天嗰類嘢，就唔係太熟悉啦」。佢話喺經濟發展上佢仍然較傳統，覺得香港經濟出路走唔開佔香港GDP逾一半嘅商貿物流同金融服務，反問「點解我哋唔做好香港經濟最大嗰瓣，喺金融商貿物流方面，做好連接各方嘅中介角色呢？」

支持創科但唔識「上天嗰類嘢」

曾俊華又話，佢𠵱家比較擔心香港未來嘅財政狀况，特別係人口老化加劇財政開支。佢話自己做財政司長時撥咗大筆錢成立「未來基金」，投資用嚟應付未來醫療通脹，但就話「理想同現實總係有距離，未來錢，未必可以留番未來使」。

退休後有參與保險金融業務嘅曾俊華就呼籲大家為未來醫療保障做好計劃，特別係愈來愈多後生仔女轉工頻密，有啲就做slasher，變咗連公司提供嘅基本醫療保障都冇。

佢話醫療科技愈來愈進步，但收費可能會超過一般人嘅負擔水平，未必每個人甚至每個政府都可以負擔得起。