【Emily】赴台搞餐廳奪榜眼 陳淑莊眼濕濕

【明報專訊】前公民黨議員陳淑莊（Tanya）離開政界後赴台開餐廳「紅棉」，開業將近一年後，今年就喺台灣美食榜「500盤」中奪得第二，僅次連續多年奪獎嘅五星級大酒店嘅晶華軒（掌廚人都係香港出身嘅粵菜名廚鄔海明）。Tanya上台得獎後一度眼紅紅，哽咽多謝餐廳同事同台灣食材。

Tanya上台話，以前喺香港都係靠微波爐「叮」嘢食，從來無自己煮飯，要感謝4年前赴台、去自己屋企食飯嘅朋友，笑言佢哋有如勇士。佢又話自己現年54歲，「沒有想過會有第二人生、第二個舞台」，感謝台灣照顧得佢好好，更好咁生活落嚟。

Tanya又喺餐廳專頁特別多謝已故食家蔡瀾，同香港大班樓老細葉一南（Danny）等，形容無佢哋，完全唔會有開餐廳嘅想法。佢引述Danny話，「開咗30幾年餐廳，從來未見過一間餐廳，所有人都未做過餐廳」。

紅棉獲好評菜式包括煙熏乳鴿、魚蓉雪燕冬瓜羹、第一刀叉燒等。