【Emily】倡港搞深海科研 邱達根：唔好咩都睇錢

【明報專訊】今屆立法會期就嚟完結，科技創新界議員邱達根（Duncan，圖）噚日同傳媒茶敘，總結話過去4年議會唔少話題同創科有關，高興能夠參與同貢獻。佢特別提到深海同太空科研，話香港可以發展；又話以往媒體有少少用產業角度去睇「就唔係太公道」，認為唔可以咩都睇經濟誘因，呢類研究可能會發現新嘅科學，從而推動科技進步。

Duncan舉例，深海生物可承受高壓環境，研究可能有助新材料開發，深海冷泉亦有潛力發展新能源。佢提到內地有唔少深海探索團隊，但內地做國際交流有局限，認為香港可發展深海科研或生物研究中心。

Duncan講笑提上星期李鎮強議員喺立法會問政府可唔可以開放「發射站」畀市民參觀，商經局長丘應樺當時答話香港冇呢啲設施。Duncan話，火箭發射要遠離人口密集、緯度要適合，香港海域發射火箭機會亦唔大，但低軌衛星製造、融資同數據營運等，香港就可發揮。被問會唔會競逐連任，佢話未諗，等會期完咗再算。