【Emily】高鐵通車7年 港鐵App可搶券

【明報專訊】唔經唔覺，高鐵香港段今日已經開通7年，港鐵公司話自通車至今已累計接載超過9000萬人次乘客，而今年首8個月乘客量達2000萬人次，按年增長近兩成，8月份更錄得通車以來單月最高客運量紀錄。港鐵公司宣布，送出總值超過130萬元嘅高鐵旅遊禮券慶祝高鐵通車7周年。

市民可以喺今日中午12時，透過MTR Mobile推出「高鐵7周年一撳即搶」會員活動，以先到先得形式領取高鐵旅遊團同高鐵車票折扣券，其中高鐵旅遊團折扣券有7094份，可以用作報高鐵團；高鐵車票折扣券共7000份，買高鐵車票可以當50元使用。

另外，港鐵話將同多家旅行社喺10月推出「秋色楓景高鐵遊」，有團畀乘客輕鬆暢遊多個賞楓賞銀杏熱點，詳情稍後公布。